الولاية نتغردايت دقت سالولايات انجحت احرش نتكرزت بالخصوص الغلة نوغي دوربى نالهوش مان اتنجم اسقسنو امدجورا اتكفى امانس الغلة نوغي الزايد اقضع غال الولايات تضضنتين انوارجلان ادالاغواط اتاوض ساعات ال دزير.
يغلب ندباب نريال اسنمران ايتلنسان احرش اسليند الكابنيات انوخدام نوغي دتفوناسيت دتغات ديلمان اموني جار لقرارة دتغردايت دالمنيعة.
اغي نتغات يدولد اتوزنزى تشكارين واجد اش امار تحونا بعد اوضان غال ونجاح اغي نتفوناست.
سبسون دخ اوحديان دين اشجع انيغلب نكرزان ادمدان دولان غال اورب نتغات اماشي يتوغ الحال بكري قاع تدار دسنت اتغات انغ سنت .
الكابنيات اسلفانتد اموشان انوخدام امكراس اجينت مدان ادولان غال اوربى ادورني انومضان نتغاتين بالخصوص لغوابي دتجموين.
اغي نتغات فلحساب نماسان دس اقن وزال انغ القيمة اتاوض غال تام انتشال النسبة نالكالوري دسات اغي نتفونست اناف مدان انبكري لمعاشنسان غير اغي نتغات ادمناو انيوان الان دالساس تمدورتنسان.
اغي نتغات دس يغلب انلفوايد تزعلاك بالخصوص امزنان ادسوفار انمناو اطانان خدمان اسيس يغلب نبسون انتكاماريت اتوسان دكل انشان دزير ادوزغار.