كثر أنباح عني وانا صياد
مكحلتي مزال راهي في يديا
قرطاسي غالي عنكم ياحساد
الشعر معاني والكلمة فنطازيا
ماني غافل صعبي على الزناد
يا ظالم جوابي ليك بالكيا
اصلي نايلي نبغي لعناد
كلامي بارود صنعة حربيا
الكرم والجود ناس الميعاد
ويا لي ما تعرفناش مزالك نيا
اقرا تاريخنا ثورة وجهاد
تبع جرتنا في كل ثنيا
طينتنا بيضة مافيهاش سواد
اولاد نايل والخيمة مبنيا
عرش كبير معيشتنا كي اسياد
على النيف ضربتنا قويا
ما نرضا بالذل مايخوفني جلاد
بوسعادة غرة عينيا
جنة في لارض مزينها ببلاد
معلومة باسمها ماهي مخفيا
قرب يالي جيت من لبعاد
الضيف عندنا حاجتك مقضيا
طبعي كي الطير ساكن لرفاد
مترفع بكلامي والشعر جنحيا
الهمة والشان ورثناها من لجداد
وتقاليدنا مزال فينا حيا
لعب الخيل كل فارس بجواد
اللحفاية وبرانس خدمة وبريا
خيالة خرجو في فرح ولعياد
يالي ما تعرف الناس البدويا
كلامنا ذكر بالشعر ولنشاد
القصبة والبندير بيها اغنيا
كلامي لحبابي قاصدكم بهديا
نمشي بر الشوك حافي رجليا
ياغايب مزالني في عهدك شاد
مستني قمري يطل عليا
العالي ما تشوفو ورقبتك محنيا