بايوب الحاج محمد اسماوي ايتونضل اسبي اقضعان اغرم نتجننت تنضلت نامي حمو اموني سوحضار نللوف نمدان ادوسين سايولوا تمو.
بايوب اسماوي يقضع غال يوش امقران دفر ايسقضع 86 نسقسان تمدورتس احدام ندزير دتروس يجد سز نبورخس تمدورتس اسقضعنت اعزام ادولماد مان يبدى اعزامس اقن سغربازن نالحراش دوغرباز نالحياة اغرم نلقرارة اسقس 1946 يعرض القران بعد ومن اسافر غال تونس يوتف الزيتونة يرني دس اعزام مان يوتف تمجروت نالكشافة دمناوت تمجروين اسسنت تمجروت تغناوت نوحرر ندزير اسقس 1957 اتوغ اتمثل انلمادن ندزير تونس ينعر مناو ادملاقة ازغار نتونس ،اسقس 1959 توشاس الحكومة نسجك ندزير اقت المنحة نوعزام العراق .
اسقس 1963 يوي الشهادة نلالسانس سن يقضع غال فرنسا اغرم نتولوز يرني اعزام ال اسقس 1967 يوتف اوخدام تنغلافت نالتاولات انوزغار ندزير،اتوعين دالممثل ندزير تمجروت الاجناس ادتشلان نيويورك جار اسقس 1969 دسقس 1973 اتوكلف ستغوين نالشرق انماس.
اسقس 1973 اتوعين دالسفير ندزير تمورت نالصين ال اسقس 1976 اعاود يدولد غال دزير اوخدام تنغلافت انوزغار.امبعد اتوعين دخ دالسفير ندزير فيينا تمورت نالنمسا. اسقس 1990 يفغ غال التقاعد دفر اسقسان نوخدام دوخلاص نالنية اتمورتس .اسقس 1999 يوتف الحلقة نعزابان نوغرم نتجننت ال اتيوي يوشش امقران دلمانة.
تواشولت نات اسماوي اتوسان سوجاهد ضد فرنسا مان ايتماس سبلان تحنوتنسان دتمدورتنسان امجاهدان اموني تزكرة نموسوني اماس ندزيرتوغان اسكرمان دس وزال جروان دي امقرانان نتقراولة فنجال نالثقة اتوغ توش فرنسا دات اغرسان .