ابدى نوسقس 2017 لسوام انيغلب ابسون انلمعاش دالتاولات نوسخدم تدار ادرنين ادالين فلحساب نالقانون انتدرمت اجديد ايتوخدام فلحساب نتمشروست نومنكز ندرمان اتاسن سالبترول مع اوط نوزال نالدينار.
مدان اغلان بكري اتوغان لاشغرسان الخير انمارو انتحونا دالكابنيات ادوخدام تموار دموشان اضضنين امبصح اتوغ غرسان اقنشرى توغان قران ازمان ادلحساب اكل بيلا شرى اتامنان سودريم اتوسكران امار نالشدة دالحاجة عمري مسوتوران .مدان اتافان الراحتنسان امار نالشدة اولقضعان اتمتران تزلان فوسسان احد وضضن .
مدان اولتوغان سرفان اضبعان ايتلنسان اسلي نالبازرات ادوملاك نويتلي يغلب بلا ما ادفاقان. امزوار اتوغان اتامنان اسوسطار دوبقى نستر دالقلت نوسشني انلان غرسان. الحكمة ابينت اسووال نيوش امقران الان اتحرم الاسراف تمدورت ادوصراف نويتلي ابسون الان دالزايد اولجي انشانسان اماشي ايومر اسس يوش امقران.
مدان اتوغان اتشلان فماننسان دكل بيلا اشرى اناف خدمان تمورت دكرزان نكلان لمعاشنسان سوفوسنسان اتربان اتغات دتيازيت الان دالساس نتمدورتنسان،لحليب دتزدال اولخطينت تدارت مع اغمايان ادومان اوحديان اتاسان سالغابة.
يلزم افمدان اماروا ادعاودن ادفكرن دولان غال اورب نتغات دتيازت ادوخدام نتمورت الان اتسمنكز ازجن نالمصاريف امار الان الحال يدجور اغلى مع توعري نتمدورت الان وسان اوسيند اسوقودان امش.
ادريم دتنــــــــاميرت
تغردايت :الشيخ باعلي واعمر
-
حجم الخط
تصغير حجم الخط
زيادة حجم الخط
- كن أول من يعلق!
شوهد:846 مرة