يحي بن قاسم باعمر دقن سالتجار امقرانان نوغرم نات املشت اغرم ندزير تمنغغت .وني ادر القرن فيد 19 يجد اقن وخدام ايزعلك تمدورتس ايالفايدة ندزير ادوغلان.
ستنفاس اتالسان غفس اقارن يل وني ايتلي اغرس يتوغ اتمول العسكر نالعثمانيين الحرب ضد اسبانيول تمورا انتونس ادليبيا.
فلحساب نوسلماد الحاج سعيد لكتابس امزروي نات اغرسان وني يوزن للوف انتزدايين النوع تازيزاوت غال تمورت نالماركان تم نكاليفورنيا بعد اقن اومفهام يد ادموان نالماركان يد يحي بن قاسم.
الماركان دفر ابراسان ادجين فمناو لرهاط نتزدايين تمورا تعربين اوضان غال وغلان اوفين بل تزدايت الان اغزر انلمزاب اتدر كاليفورنيا سومن اوين مناو لرهاط. التجربة تود تضفوين توحديين ادموان نتكرزت نالماركان دولند اوين اقن ومضان ايزعلك انتزدايين غال كاليفورنيا مان الجو تقريب انون انوغلان الحال يحمى مع الوجد انومان اوحديان. التجربة تود تضف توحدييت اقت الغلة ايتزعم زاقان ايحي بن قاسم باعمر اتوعرض الماركان يحضر ادشان نالغلة تمزوارت انتيني نتززاوت كاليفورنيا. لرهاط انتزدايين انغ لنواع نتيني اغلان لاش المثالنسان ستم نالبنة دالغلة توحديت الان لاش المثالس انشان وضضن.
