انكال نتداقين نالزيتون اغزر نلمـزاب

التجربة نونكال نتداقين نالزيتون اغلان تبدى غرس مناو اسقسن مان ادباب نتكرزت اوضن غال تضفوين توحديين بالخصوص تمورا توحديين مع الجو نتنري الان اتعاون اتشور نتداقين ادونت نتضفوين توحديين.
مدان توغان نكلان تداقين نالزيتون لغوابننسان جار مراو دمراو دسمس نتداقين اماشي ايلا الحال لشجار تضضنتين انتشينا دالقارس اوستهلك نتواشواين.
الحملة نونكال نالزيتون تبدى دوغرم نلقرارة دحاسي لفحل دالمنصورة  دالمنيعة دمناوت تمو تضضنتين انغزر ننتيسا ات ازجن اونتد تضفوين توحديين بالخصوص دفر اتاف ندباب نريال دوخدام اوسنمر نويتلنسن اخدام دوعصار نالزيتون .
اغرم نلقرارة الان دس اماروا للوف نالهكتارات نتداقين نالزيتون مان الغلة نالزيت تقضع انلان اسودجومن اكرزان.
اغرم نالمنيعة  دخ الان ابدان دس اكرزان انكال نتداقين مان المساحة تقضع دس اماروا اجار 1250 هكتار دفر اتوغ 118 هكتار اسقس 2000 النسبة تولي س900 في المئة .
تمورا توحديين نالزيتون اتنتناف البلديات المنيعة دلقرارة س21 الف 410 هكتار اتاس حاسي لفحل 3.270 هكتارمتليلي 2.090 هكتار
فلحساب نسرابس نالولاية نتغردايت الان اسودجومان الغلة 2150 طن نالزيتون اسقس دفر اتوس نالغلة دمناوت البلديات . الغلة تولي فتن نوزدغات اتوض 1864 طن. المردود نالزيتون اتاوض غال 26 قنطار الهكتار اقن امار ايرقب اغلان تدروسي نتجناو مع الحمان الان اسضورت يغلب نالغلات اغلان .
الحملة نونكاض دونقى نالزيتون يعنى 827 هكتار ادس 166 الف نتداقين سقت المساحة 1250 هكتار مان الثروة نتداقين تاوض غال 300 الف نالشجرة اتونكلنت غرس مراو نسقسان دالولاية نتغردايت. اماشي اتوسلفنت سنت الماشنات نوعصار نالزيتون جار اغرم نلقرارة دتم ننتسى ات ازجن اسونسنت اطوف نالغلة نالزيتون نكرزان امار اتوغان قضعان غال التل اوعصار نالغلتنسن.
الفايدة نتداقين نالزيتون دس سن ابسون اشرى امزوار دين الغلة اشرى فيدسن ارى نوض دالغبار الان اشات تنري مناوت تتشال اوسقس.
الدولة تلا تسرس اقن وهيل ايزعلك ايالفايدة نمكراس باش ادخدمان تمورت نكلان تداقين ارنين النسبة نالغلة نالزيتون دزير الان تدجور تطف اموشان امزوار جار تموارا نالدنت الغلة نالزيتون.