الزوالي

زوالي ومعيشتنا فيها تمرميد
الهمة وشان راس مالي
قانع بحياتي واش نزيد
الصحة والعافية ولقمة حلالي
نشوف قدي واش داني لبعيد
عايش نهاري وربي في بالي
 ما يخوفنا غاني مولا حديد
لا صاحب جاه  ليام توالي
عيش حياتك كون سعيد
الدنيا غدارة وترخس الغالي
ناكل خبرة من عرق ليد
ولا نطلب خروف ويتعطالي
عايش حر وما نعرف قيد
طبع الطير مستركب عالي
طايع ربي ولا غيرو سيد
من غير المولى لا نشكي حالي
كيدك يا دنيا لبنادم كيد
خداعة وتميز الوكر الخالي
أرضي يا طيري وما تاكل من صيد
يا راكب ليام كي العودة تشالي
 ما نسكن قصور قربي بجريد
مفرش حصير حال الزوالي