يا شمــــــــعة كيما ابكيت ابكيتي نار
في ليلة ظلـــــــــمة ابليتك باحزاني
انتي بيك النار تقــــــدي فيك اجهار
وأنا من الامحان نقـــــــدي دخلاني
أنت ماكي حاسة صــــــــــــنعك عقار
روحـــــــــــك من جماد كلش براني
وانا بيا روح مــــــــــن صنع القهار
دم اولحم انحس نبكي مقــــــــواني
انتي روحــــــــــك دارها عبد الغفار
وأنا روحي صنع ربي واحيــــــاني
جمعتنا الأقـــــــــــدار كي بتنا سهار
انتي نـــــــــورك ضو وأنا روحاني
درتي جبرة كي اكتبت اعليك اشـعار
خليتي ليلي اضـــــوى حين اغزاني
ابلا بيك الليل يقـــــــبن في الاسحار
وابلا بيك اهمــــــــوم قلبي تملاني
انتي تبكي نـــــــــور يملي عني دار
وأنا نبكي اكلام تخــــــــــفيه اكناني
لوما ضـــــوك يالشمعة لاشي صار
لوما ضــــــــوك باه نكتب الاوزاني
فيكي ســــــــر اكبير قـــالوه النظار
فـــــيك راحــــــة بال تملي وجداني
ونستيني اعلى المحاين روعي طار
لهمـــــك نح الغيظ شعري نساني
قـالت ياحكيم قـــــــــــولك جا تعبار
كيما قـلت اصحيح ماهـــــو بلعاني
حتى نايا راه حبي قـــــــــديي النار
مـــن لهفي عنها انـــذوب ابحماني
نبكي بكي الفــــــرح كي وليت افنار
جا حــــظي والنار شعلت باوجــاني
لا تحسب بكيي اعليها نــــوح اوعار
راهو حب الشـــــــــوق عنها بكاني
مانشتيش انكون عانـــس في لقجار
في وسط الروماز لا حـــد أقـــداني
نتوسّخ من شي احوايـج دون اعبار
يتبـــدل شكلي اعـــلى زين اصفاني
يلزم نعمل فايدة وجهي يحـــــــــمار
وانـــذوب اعلى حرمتي بين اقراني
ياك أنايا خلقتي نضـــــــــوي بانوار
نقــــدي باش انذوب وإيبان امكاني
نسعـــــــد ناس امثايلك عبد الغفار
تتونس من وحشتك كي تلقاني
قـلتــــــها لله درك فعــــــــــــلك بار
قــــولك زاد اجميل بالفضل اكساني
من صفات اعـــــــرفتها منك تزهار
فيــها درس اكبيـــــــر وافي حقاني گ
علمني حـــــــــق الوفا فوق القنطار
وراني دور النسا فيه امعـــــــاني
ماغاديش انــــزيد يكفي فاح اعطار
فيه افـــــــوايد كي القمح المرواني
ضرك انـــوري نسبتي ميش افتخار
اسمي بشيـــــــري احمد جا قيواني
باصلاتي على الهاشمي طه المختار
نختم هــــــــــذا النظم وانتم اوزاني
