اسن الخميس ادناس ادسونجمان امسلمان اس نتلالت نوسر نيوش امقران اسن 12 ربيع الاول هجري. اس انوني اسونجمان دي مدان السيرة نيوش امقران دالاخلاقس دسوضاس غال امزانان باش ادجورن تشليس ..

اسونجم دوسدر نوس نتلالت نوسر نيوش امقران تزاليت غفس دسلام تمو نوغلان اولجي انموشان اضضنين تمورنتغ انتمنغغت مان مدان اتان يغلب نلعوايد داماشي اتوغان  تدران مدان نبكري اسونجمان اسدر نوس نتلالت نوسر نيوش امقران محمد تزاليت دسلام غفس.
اسدر نوس نتلالت نوسر اغلان ايبدى مع تمديت مان تمجدوين بدانت اتوجدنت اسدر نوس  سوززدق نالحالة سوشعال نضواوات مع افراض نغولاد دبريدان.
دفر تنضاس ادبدان مدان تالين غال تمجيدا تكبورت اجانا نوغرم مان ادعزمان دس القصيدة نالبوردة الان دقت القصيدة تساول ستمدورت نوسر داماشي اسوض تكيردة نيوش امقران غال مدان .
الوالدين تاوين ادسان ترونسان دمزانان غال تمجيدا تزعلوك باس ادسنان  ازال نوس انوني الان ادرقبان لمدان امزروي دتمدورت نوسر نيوش.
اماشي اتملاقانت تواشولين تدار اسونجمان دغنتنين اس نولالي نوسر نيوش امقران اموني سوشعال نشموع تالسان دس تمدورت نوسر نيوش دتمدورت لالاحليمة الان تربى محمد داماشي ادتشر دنوجيل دفر تماتانت نالوالدنس انت دبازان.
اغرم نات ازجن دقن سغرمان اغلان الان زدغ اطف دالعادة نوسدر نوس انوني امونس سقت العادة لاش المثالس اغرمان  اضضنين  تسناسد قاع تروى نات ازجن سايولوا تمو ندزير .
دفر تزاليت نتسمسين ادملاقان امزانان مع الوالدننسان اتشمران ادسان انارن نالزيت دزاقان مع ابردان مولودْ النبيء محمّد المصطفى السراج المنير صلّى الله عليه وسلّم اتاوين انار نالزيت غال ايولوا اموشان مان تفسكوين تقمانت ال تزاليت نتنضاس بعدس ادتوصوضاف المعروف اماس نتمجيدا دفر توتروين دتزاليت فوسر نيوش امقران  .
اسدر نوس نتلالت نوسر نيوش امقران دقت العادة اسوس دين اسوض نتغسي نوسر غال الوشول دمزانان دقت المناسبة باش مدان ادفكرن دس تمدورت نقن سمقرانان  نالدنت .