يغلب نمدان اتسلان ستضلست انغ المكتبة نالمعصومة العهد نالرستمين تيهرت امبصح اولسننان ازال انغ القيمة نالمكتبة دالعلم ايتوغ ينشر امار نالرستميين.
المكتبة نالمعصومة اسلفاتد الامام عبد الوهاب ممس نعبد الرحمان بن رستم .وني العهدس يوزن غال تواتس البصرة الف دينار باش اسدسغان مناو المخطوطات انن اوزنازد اقت ترجافت دس 40 نيلمان شامران للوف نالمخطوطات دلكتوب غال تيهرت.
امقرانن نالرستميين تواسنان سوتهلى دنعزامن ددباب نالعلم ادجيناسن انشان رزمان تورى اقاع الفقهاء دالعلماء نقاع المذاهب مان اتملاقان الحلقات اوشمرس تسوستنين نالدين دون ادوسين القران دالسنة دون ادجين انعزامان امزوار.
توقدوت انغ الديموقراطية تمزورت اتلولد العهد نالرستميين مان ادموانس اوشين تلل انغ الحرية امدان نقاع المذاهب السنة الشيعة الاباضية اددرن فمارا لاش اقن الفرق جارسان اسولان اتشمرسان دقاع تسوستنين نالدين السياسة بلا اقت تالوفت.
تضليست نالمعصومة لاش المثالس تمورا نالمغرب امقران الوقتن دس 300 الف نالمجلدات نقاع لرهاط نالعلوم نالدنت دالاخرة مع لكتوب نالمذهب الاباضي . مدان توغان عزمان لصول نالفقه التفسير الحديث علوم الفلك.المكتلة اتوغ تجروا قاع المؤلفات دون اورين انعزمان نقاع المذاهب.
اسقس 296 هجري يهجم ابو عبد الله الشيعي انت دالجيشسس فتيهرت اولدجي دس اشرى اصح انغ ابد فدارنسان اولرحم لا مدان لا الهوش يقضع غال المكتبة نالمعصومة اتزلاف اماشي تلا يعني يزلف الحومة 300 الف مخطوط يمسح امزروي نقت الامة دالجهد ننعزمان اتوغان تارين اتعافرن اوسوض نووال نرب دالاحاديث نوسر نيوش امقران غال ايولوا تمو دالاجيال باش الدين اولتماتيت.
