كلود بافار اقن سالمهندسين نفرنسا باب نلكتاب اسقارن تيفاوت انوغلان يفغد اسقسان نالسبعينات اسوال دس فتغرم انغ الحضارة انوغلان دس اتصاوير ايبهانت فغرمان دتدار دغولاد دموشان نوزوني انومان
تنفوست نكلود بافار يد اغلان تبدى ختن ايرقب اتتشلت تمزورت اغلان توتف اولاس اند لكتابس اوفين اقت تغرم اماس انتري اند يلزم ادزورغ اتميو الان لاش المثالس انشان وضضن يرني ابيدوو اجار ختن ايوط غال وغلان يرقب استطاوناس تغرم نمزواراموني اسقسان نالستينات دالسبعينات يدولد اولتنجم ادقضع اسوغلان انغ ادطول فرنسا .
تتشلت تمزورت يقم ابار سالقوانين نالبنيان اداماشي اتسجوران سوفوس انلاومن نالبنيان ادومان دالكيفية نالنظام نوسلي انتدار ادوبنى نغولاد اش اشرى غرس المعنى اقت تم تمركانتيط ستغرم انغ اقت الحضارة كل بيلا شرى اسول اسشنى تكبوري دقت المعجزة تنري.
يقار كتابس بل تغرمايو توليد سوفوس نقن مدان اولوتفان اثت الجامعة انغ اقن المعهد ابين الخبرة دالتجربة سمزوار انجمان باش ادبنان تنري دتمورا تزقاغين اقت تغرم بارن دس امقرانان دالمهندسين نالبنيان ادفغان سالجامعات تزعلاك فرنسا دالماركان.
