ات اغرسان زذغ الان اطفان دقت سلعوايد انبكري ايتوسونجام اش اسقس مع وقراب انوقضاع انمدان سوغرم غال الغابة مع وتاف نونفذو دوفورهات اتقمان ال وتاف نتكرزت ادوبدى انصماد.
العادتو اقارناس اعمار مان مدان اتوجدان اماننسان باش ادرحلان سوماس نوغرم دالحمان غال وماس نتجموين ادومان دوفورهات ..العادتو اتبادى مع يور نجوان اتقم ال وقدى انسبتمبر مع وتاف نتكرزت ادوقدى انونكاض انتيني مان مدان دقلان اتوطان غال وماس نوغرم قبل ابدى انصماد الان يوعر امش تنري امار اتوغ بكري لاش التاويل انماروا مدان اتوغان ضضعاف ايتلنسان دروس.
اغرم نتغردايت دغرم امدجاروا الان زذغ يطاف دالعادتو مان اناف امقرانان اتوجدان اقت تشكارت اقارناس تشكارت انوعمار دس كاوكاو ادلحلاوي ديباوان دقت تشكارت نالقوت اتوصودوف امزنان مع اقون نسامورا دجديدان بالخصوص تملحافت اتبورخست.
اعمار دقت العادة غرس اقن لمني ايزعلك تمدورت انمدان بالخصوص بكري مان مدان اسودجومان باش اديتاف انفذوا اوقضاع غال الغابة دقن اوسافار امغر بكري لاش التاويل انماروا مدان قضعان غال اقن العالم وضضن دجديد نوفورهات دوحوس تجموين ادلغوابي.
انسرام فات اغرسان مان الان ادسولغان لعوايد انبكري اتروانسان باش اولقضعنت اماشي اقضعنت يغلب انلعوايد الان تاتفنت امزروي انغ التاريخ نات اغرسان .
