على نورو ناري وافتني بكلام
وطار عليا النوم مسهرني بليالي
ظل السهر ايدور دورلي لعوام
سوادي زاد لهب ولا ضو صحالي
قنديل الشط طفى ماليه زمام
وجفايا بحري ماه بالجالات بدالي
يالوعتي ع لرياح و زكارة ليام
وهلال طفا نورو ظلماتو م كحالي
ياريت يكون نعاس ماهوّ تنوام
ولا غفوة نشوفها رحلتها بالغالي
غلبتني غلابة في دينها مدوام
وغلبني التخمام ما قلتي بقوالي
قلت نتا همام منك جا التعتام
وكلامي تكمام وما تعرف حوالي
ثيقتي ف ليام و رماحي لسهام
فاقداها بردام م نفاسك ما تهوالي
بدلت التهيام مكراتك مالتحتام
بدا ليا الغمام وصوتك ما يحلالي
وصيتك ع لندام من غلطة لوام
عديتها بتمام جفيت عليك هبالي
اليوم زاد ظلام حبك راه صدام
كان قلبك غرام هجرني ما ولالي
ياما كنت النام وكبارو لحلام
م كلامك هدام و قعت بيك نخالي
واليوم ولاو ليام علاه يا ذمام
رجعتلي لسقام في غدارك ذبالي
ما عانيت حرام اكتب ليا بقلام
عبرلي بسلام بحوالك يسلم حالي
انا لي تعديت و بالكلام تأذيت
بقاولك سعيت عليك رميت حبالي
لرجوعك عييت بكيت ماتهنيت
باليالي زدت فنيت من حبك تكمالي
بالسهام تكويت و برماحك وليت
ياربي تبليت شاوية محيرت بالي
من حبك قريت بشمعاتك طفيت
نكرت دخول لبيبت من فجك لخالي
لا فانهار زهيت بهواك الترقيت
راني اليوم بغيت نشم هواك الغالي
منك زدت شقيت بركاي التشتيت
خبريني بالبيت شعارك ما تخفالي
نتا بحرك طويل بركاني تهويل
جفا قلبي مالويل ومرارك تقتالي
حفا قلبي ع لليل من حب تمثيل
درت بيا السيل عليك هديت جبالي
كنت ليك نميل ما عندي تحويل
يوم جرات الخيل في دوار خوالي
وهدرنا ع الصيل عليا لا تبديل
كي تبعت القيل و تكذيبك لغوالي
قلبي عاد ايحيل م لعذاب ذليل
كرهت كل جميل توبة الرب العالي
كلش فيك ايثور ماليه منظور
صبري اللشاكور منك يعدل حالي
هاذي دنيا الدور ملايانة بالزور
فيها ذقت المور من هوالك تخبالي
شتقت للسرور من وجهك ينور
وكلمة بين سطور مرفقها بالعالي
قلبي راه معصور من حبك مغدور
ولا نشوف النور من ضرك قلبي خالي
شتيت حبك ايدور مالحقاد يغور
منوا ننساو الجور ما قلبي بقاولي
والله يا مهموم حاجة ماراح الدوم
ضرك تشوف النوم فالصبحية تغدالي
يالي قلبك مردوم قربلي لعموم
غلي فيك اليوم نهارك ما واسالي
حبي فيك مظللوم فيه بقيت نعوم
مالقهر المحتوم ولي حياتك تصفالي
ما تحط عليا لوم كنت عليك نهوم
ولى الزهر اليوم خطبني من لممالي
كلش فيك معلوم نمسح كل غيوم
حياتي ليك الدوم مالرجعة تبرالي
مكفانا لسموم نفارقو كل هموم
قلي واش تلوم قلبي عمرك ولالي..
قلبك ليا جباد نطلب ربي ينعاد
نكتب بالمداد على جبيني واوصالي
بدمي نوصي لشهاد الغبنة ما تتعاد
حبنا في تجداد من هذا الكون البالي
ونديرو الميعاد نجيبوا كل عباد
مثلوا ما لعياد منهم مضرب المثالي
الشدة فالشداد ونقرص ع لزناد
و نقول يا سداد سد الفجوج لخوالي
رجعلي لمجاد على القلب لي زاد
مايريبني هداد هذا ربي ما عطالي
دمعك ليا تبراد عل الحب لي عاد
يافرحة لبعاد بالروح والقلب المالي
ماقلتلي فالمراد يا قرّابة لبعاد
غزلي فيك نشاد م لحانك يهنا بالي
قلبي ليك يصر من زيك ماينظر
بكلامك المعطر فنات عيون لعسالي
ماعاد ليك صبر في سهرية القمر
ونجمي فالفجر محرحر قص طوالي
عليك وليت نجر قوا عندي لفخر
في سمانة و شهر لازم عرسي يهدالي
حنايا مجمولين بين الحين والحين
يملانا لحنين في اليامات لخوالي
يارب العالمين بالقدرة يا المعين
و نقولو آمين ونرضاو رضاية العالي
