اسقس 1830 ختن اتصدم فرنسا فدزير ستم نسيدي فرج امار اتوغان الاتراك اطفان الحكم دزير .الباي الحاكم ندزير يوزن اقت تكيردة اايولوا ادموان نلعراش الان تمورتنغ باش ادزنان ارجازن غال تمنغغت اورى فدزير دحارب نالعسكر نفرنسا.
توات نوغلان توغان دمزوار لابان الطلب نالحاكم اوزنان الف نرجازن جرون قاع تم نسطاوالي امار ابدان العسكر نفرنسا توطان سيدي فرج اسن 13 جوان 1830 ابدان امنغان دتيت جارسن اوضان دس يغلب نمنت اسسن اطفيش داود بن يوسف يواس نالقطب انن تونضلان اغرم نسطاوالي امبصح تنضلت انغ المقبرة تومساح وسدقم اقت لمارت غال وسو.
ستوات دخ انعرن امنغانو فلحساب نالشيخ النوري لكتاباس اند بل سنن استشهدان امنغان دتيت عيسى بن موسى اقن سودمون امقرانان نتوات .
العسكر نفرنسا سالقوة اغرسان نجمان ادسعان لحقان امجاهدان ال لجوايه نالقصبة اتقم الحامية اقت تشات ترى فدزير دين الحامية نات اغرسان اورير نسيدي بنوراموني سالشهادة نونغلاف نالمستعمرات نفرنسا الجنرال فيفان .
توات نوغلان ختن اسلان سووض ندزير فوس نات ومان دوستشهد نيغلب نتوات ستفاوت نالعسكر نفرنسا اقمان شارد نوسان بلا ما ادشعلان تفاوت تدارنسان.
اماشي استشهدان يغلب نتوات دخ امنغان دتيت اضران جار الحراش دالبليدة فتبجننسان ابن زعموم دالحاج سيدي السعيد بالخصوص المعركة اضران حجوط دبني مراد مان ات اغرسان زذغ يلا غرسان غال اماروا اقت المقبرة ابريد اسالايان غال وورير نالشريعة دس 35 محراس نتوات اوضان المعركة.
