اش اغرم سغرمان نغزر نوغلان اناف دس اقن ونشان اتوخصص اوملاقة نمدان اوزنزي دوسغى انشانو يوسد اداين نوغرم انغ ازغار نوغرم دين السوق.
اسو انسول سالسوق نوغرم نتغردايت الان دقن سلسواق ازعلاك اغزر نوغلان سقت المساحة  تاوض غال  3400 م مربع دس 98 نكومار الطولنسن 75 متر اما العرضنسان 44 متر .
السوقو يتوغ ابدى امزوار دنشان نوملاقة نترجاف اتاسنتد سمناوت تمو تاونتد اغي .اودي . دمناو ابسون اضضنين اسبدالان السلعتنسان  سزرابة دبسون اتوخدامن اغلان . دنشان دخ ندوملاقة دوجرو نمدان بعد املاقة نتمجيدا بالخصوص اسن الجمعة اومبدال نسلعي دمبدال نلخبار نتمدينت دون الان اضرى.
اماس نالسوق اناف اقن ونشان دس مناو اضغغان تودجان اماس نالسوق تمثلان امضان نالاعيان  نوغرم نتغردايت دنشان نوجرونسان دمفهام دمصالح جار توات ميضرى شرى اغرم  دنشان دغ نتزاليت ابرنيان دوس اتاسد سوزغار.
اناف ايدران نالسوق ينض ستحونا اوزنزي نالتاولات اتوخدامان اغلان انزرابة دتقشابيين دتشبرين دايولوا ابسون اسحقان مدان تمدورتنسان اناف اغلاد نزرابة اغلاد نلعقاقر اغلاد نغمايان اغلاد نالضوفت اغلاد نويسوم دونشان نوزنزي نالهوش انيلمان دوفراش اماس نالسوق.
السوق نتغردايت دنشان دخ نوسدج ندملاقة نمدان المناسبات تزعلاك امار نالانتخابات وسان نالاعياد نتمنوننت ندزير دنشان نوسدج نالاحتفالات نالبارود دالقارابيلا دنشان اتخيران اتومان دالزوار اتاسان اوسغى نبسون قبل اقدى
نالزيارة غال اغزر نوغلان .
تم تغربيت نالسوق اناف اقن الملك اوساقبل ننجوان يتوغ دالبيروا نتوامان دس اسجوران لمور نالعامة مع اقت تدارت نتموسني توسد دفر السوق توسجورى سوفس نتوات مان فران دس تمشراس نمدان دلمورتنسان.
اماشي اتوصوران دس مناو لفلام نومزروي انغ التاريخ ندزير اسقسان نالسبعينات زورنت يغلب نودموان نالسياسة ندزير دوزغار سوزال اغرس دالهندسة نالبنيان الان لاش المثالس انشان وضض تاتف دخ التراث الان دقد الحماية ناليونسكو اتوسجل تغرم نالتراث نتموار نالدنت اسقس 1982.
اسقس 1997 تسرس المديرية نضلس نالولاية نتغردايت سومعاون يد الديوان نوقرى فالتراث نوغلان اقت تشموست اورمم نالسوق مان اتودج اقت توزى اتوعاودان قاع امورناس بعد ابدان رشين توطان مع اعاود نتمورت نالسوق سوضغ نالصم.