النظام نوزن نومان نسافان اغلان دقن النظام غرس دلان زدغ يلا اطف . الفضل اددول غرس اسمنع نوغلان ستالوفت نترمزي ايرقب اغلان مناو تتشال مان مدان اكبار تالسان اقارن بل قضعان مناو اسقسان لوكان اولجي ترسين دالنظام نوستف نومان نوسوف غال تجموين دتشاريت نترسين اولتقمي لادحد يدراغلان .
وني دقن النظام خارن دس اماسانن ددباب نالبنيان نتمورا نالدنت ازوران اغلان اولوفين  المثالس انشان وضضن سومن تمجروت ناليونسكو تستفت التراث نتموار نالدنت دقت تغرم نقاع مدان مع احافظ غفس قبل ما ادقضع.
لكنغ نسان بل امان نوسوف دسن يغلب نبسون اسشراهان تزدايت دتاداقين فنجال نالعضويات الانت اماس نومان سومن مدرحم يوش امقران اناف تجموين زاهانت شرهنت تافنت اماننسنت ادقل غرسنت تمدورت.
ستم تضضت يغلب نمدان الان رقبان النظام دالتاولات نوزوني نومان اماس نتجموين دقنشرا دالزايد اتعطلتان اتعطل تمدورتنسان بالخصوص دفر اعمار نمدان الطول نوسقس اماس نلغوابي اولغسان مدتشران غبش ادافان سوف يدجور اغولاد اشورن سومان  اولتنجمان ادقضعان . يلا وس يرجل قاع تسنباض غال وماس نالحوشس يلا وس اسوتور اسبدل نوبريد نوسوف غال وماس نالواد باش اولتتاف غال وماس نغولاد.
لكنغ نسان بل تغرم انغ الحضارة اولدومي دم ادياس اقن وس اماشي اضران مناوت تتشال اغلان مدان اولوفين تستت نومان باش ادسوان انغ ادسسوان تجموننسان ادسوان لهوير امغر امان تمدورت نكل بيلا شرى القلت نومان اتقابلت تمتانت نكل بيلا شرى دنج تمورت.
زدغ ادياس اقن وس مدان ادولان غال وبراس فومان اماس نترسين الان يغلب نترسين  توردمنت اماس نلغوابي اتشلا سالعين نالبايليك باش اسسو الغابتس مع
اخلاص نالكابينة نومان . ساعات امان الان ساعات لاش ادياس اقن وس اديلي لاش قاع . دن لاش اقنشرى اتسمنع غير اماس نترسين اشورنت سسوف دومان نلغدير.
امزوار باش ادعمرن اغلان امار اتوغ لاش دس لا اقت الشجرة لا اقت تزدايت تمورت تزقاغت اورران دضغاغان . ادجورن فدارننسان ال وارجلان اقت 200 كلم باش ادوين تموتيين دتزدايين فيلمان ال اغلان عافرن حفران ترسين سوفسنسان تاوضنت ال 10 د 20 متر اتقمان تيرست اقت ساعات 40 نسقسان.
النظام نوقاي نومان نسافان سوماس نتري غال وماس نتجموين اقمن ديلان انتنين خدمان لمسارف دترجوين ضدجيض دقس جار 10 د 20 كلم امار اتوغ لاش التاولات نوخدام انماروا توغان خدمان سولجور دفسنسان.
اقن وبريد نوورغ دقن الخير ايزعلك اجننغتد امزوار باش انلي غال امارو انتدر اماس نالخيرلازم غفنغ اشرى اقن دين احافظ فالكنزو انحمد يوش امقران باش لدرحم امزوارمان الان .