المناسبة انودوال غال تغوس نودلل تضرى اقت تفسك ايتزعلك الرحبة نالامام عبد الوهاب اغرم نات بنور دفر اعاود انورزام نالسوق ندلالالة دفر خمسين نسقسان انورجالس اموني اسوحضار انيغلب انمدان ددموان نوغرم نات بنور .
تفسك تبدى اسوعزام نعزبان مناوت الايات نالقران دتوتروين الان دقت العادة نات اغرسان دم بدان سالقران دتوترى باش يوش امقران ادنمر تغوسوننسان.
بعد ومني يبدى انداه انتدشلوين اموني سقن ووال نومقران انتدشلا نوفورهت نوغرم نات بنور اسول دس ستغوس نودلل نسلعي بكري اماروا اتوفكر غال ودوال انوزارم نالسوق دسات التجارالان اديوي اقت الفايدة اتروى نات بنور ازنزي ادوسغى دوسجوري نسلعنسان.
اماشي ايسونجم الشيخ بانوح سالقوانين ادلعراف قلحساب نوسقم نامي سعيد اعنان اسجوري انلسواق دوزنزي ادوسغى . اماشي اتودج اقن العرض فالكيفية نودلل نزرابة باش مدان ادسنان الكيفية انوخدام ادويجور اةل اقن ادوقران انلحلال اخدامنسان.
اقدى اتودج اقن الفرح سوفوس انترباعت نالدندون اسوحضار انيغلب انمدان ادوسين ادفورجان باركان اسودوال نالسوق ندلالت غال اوغرم نات بنور.
اونسونجم بل تغوس نودلل تقمد غير اغرم نات ازجن بعد اتمضى اسقسنو امدجورا اغرم نتغردايت بالخصوص دفر اسقسان نالتسعينات مع امونكز نالسياح ادمدان اتاسان غال وغلان اوحوس اوقاي ادسان، ابسون نالحرفة اتوخدمان اغلان سوفوس نتمطوت.
